Venjingarmiðstøðin í Páls Høll verður nú boðin út alment, og tað er Vágs kommuna, sum bjóðar miðstøðina út.
Síðan Páls Høll læt upp, hevur venjingarmiðstøð verið í Páls Høll, sum eitt tilboð til borgarar og vitjandi í Vági, og øll árini hevur miðstøðin hildið til á fyrstu hædd á 120 fermetrum.
- Vit ynskja nú at víðka um tilboðið at venja í Páls Høll. Tað merkir, at hølini til venjingarmiðstøðina framyvir fara at fevna um alla fyrstu hædd - ella tilsamans á 240 fermetrar.
Tað siga tey í Vágs kommunu, sum leggja aftrat, at tað eisini er eitt ynski hjá kommununi, at útgerð og venjingartilboð verða dagførd.
- Í samband við, at leigusáttmálin til venjingarmiðstøðina í Páls Høll skal endurnýggjast, og at kommunan víðkar um fermetratalið, bjóða vit nú miðstøðina út alment.
Um heimasíðuna hjá Vágs kommunu kann meira lesast um almenna útboðið. Freistin at lata inn tilboð um at reka venjingarmiðstøðina í Páls Høll er á miðdegi hin 13. apríl.
