Andrass Johansen (myndin) var við frá dystarbyrjan, tá Fremad Amager á heimavølli í Sundby tók ímóti Roskilde í dysti í triðbestu donsku fótbóltsdeildini. Tíverri fekk Hørður H. Askham onga spælitíð fyri Roskilde í kvøld. So tað bleiv eingin føroyingauppgerð á hesum sinni.
Fremad Amager vann dystin 2-1. Tað var annars Roskilde, ið legði seg á odda longu í ellinta minutti. Tá 65 minuttir vóru leiktir javnaði Jeppe Simonsen fyri Fremad Amager, og heilt móti dystarenda gjørdist Alexander Petræus stóra hetjan hjá Fremad Amager, tá hann skoraði sigursmálið til 2-1.
Aftaná fimm leiktar dystir hvør er Roskilde næstfremst í deildini við níggju stigum. Fremad Amager er nummar átta við fimm stigum. Sigurin á Roskilde var fyrsti sigurin hjá Fremad Amager í hesum kappingarárinum.
Leygardagin 6. september hevur Roskilde heimadyst móti Skive. Dagin eftir hevur Fremad Amager heimadyst móti VSK Aarhus.
