Nú hava valstøðini kring landið verið opin í góðar fimm tímar, og nógvir føroyingar hava longu verið á vali og greitt sína atkvøðu. At tað er val sæst týðiliga á ferðsluni til valstøðini, og í heila tikið er fólkatingsvalið høvuðsevnið hjá teimum flestu føroyingum og dønum í dag.
Høllin á Hálsi er størsta valstað í Føroyum, og har hava fólk streymað til í allan fyrrapart. Jóhan Petur Hentze er formaður í valstýrinum í Havn, og hann leggur merki til, at valluttøkan er høg. Hann sigur, at klokkan 14 í dag var vallutøkan so mikið stór, at hon var seks prosent hægri enn somu tíð til seinasta fólkatingsval.
Valstøðini lata aftur klokkan 20 í kvøld.
