Victor Valdés hevur møguliga leikt sín seinasta dyst nakrantíð fyri Barcelona. Barcelona málverjin noyddist út við skaða í dystinum móti Celta Vigo í gjárkvøldið við einum knæskaða. Alt bendir á at málverjin hevur fingið ein krossbandsskaða, ið vil halda honum vekk frá fótbólti í longri tíð.
Hóast evnini hjá Victor Valdés ofta hava verið fyri atfinningum, so skerst ikki burtur at úrslitini hjá Barcelona við Valdés í málinum hava verið framúr góð.
Barcelona hevur við Victor Valdés í málinum vunnið fremstu sponsku deildina 6 ferðir. Umframt tað, so hevur hann verið við til at vunnið Copa Del Rey 2 ferðir, Champions League 3 ferðir, HM fyri feløg 2 ferðir, UEFA Super Cup 2 ferðir og spanska stórsteypadystin 6 ferðir fyri Barcelona. Victor Valdés hevur eisini vunnið HM og EM fyri landslið einaferð. Tað er tó í báðum førum sum eykamálverji.
Victor Valdés gevst í Barcelona í summar. Orsøkin er tann at málverjin vil royna eina nýggja avbjóðing.
Barcelona hevur sett navn á avloysarin fyri Valdés, ið er ungi týski málverjin Marc-André ter Stegen sum spælir fyri týska felagið Monchengladbach. Ter Stegen vardi málið fyri týska U-21 landsliðið á Tórsvølli í fjør.
32 ára gamli Victor Valdés hevur higartil einans umboða barndómsfelagið FC Barcelona, men skiftir í summar til eitt annað felag. Tað er ikki greitt enn, hvat felag hann skal umboða.
