Í dag eru 12 málningar hjá Sámal Joensen-Mikines settir til sølu hjá danska uppboðssøluhúsinum Bruun Rasmussen. Frammanundan stóð ein annar málningur eftir Mikines til sølu, og tí eru samanlagt 13 málningar tøkir at keypa nú.
– Tað er rættiliga óvanligt, at vit kunnu seta eina slíka samling til sølu. Málningarnir eru í góðum standi, og teir spenna víða, bæði tá ið tað kemur til motiv og tíðarskeið, sigur Niels Boe-Hauggaard, sum er deildarleiðari fyri modernaða list hjá Bruun Rasmussen.
– Málningarnir eru frá búgvi hjá einum samlara í Danmark, sum hevur bygt sína samling yvir eitt langt áramál. Tað er eyðsýnt, at hesin samlarin ikki bara hevur keypt okkurt, men hevur við vitan og umhugnsi keypt góðar málningar og hevur tilvitað skapt sær eina fjølbroytta og sterka samling av Mikines. Nú skulu hesir málningarnir so seljast, sigur Niels Boe-Hauggaard.
Tann eini Mikines-málningurin verður seldur á uppboðssølu 27. februar, og hinir 12, sum júst eru settir til sølu, verða seldir 5. mars.
Samlaða metingin av teimum 13 verkunum er omanfyri eina millión krónur.
