Orsøkirnar til hesar ætlanir sigur ráðið verða, at ynski er um, at Uttanríkisráðið fær størri eindir, enn ráðið hevur havt seinastu árini, og at nýta starvsfólkahópin, ið Uttanríkisráðið hevur í dag, enn betur, soleiðis at ráðið gerst enn virknari og kemur at virka á bestan hátt.
Starvsfólk í ráðnum hava í dag fingið handað ætlanarskriv, har ið tey verða hoyrd um ætlaðu broytingarnar, soleiðis sum ásett er í fyrisitingarlógini.
Tær bygnaðarbroytingar, ið ætlanir eru um, eru at avtaka fýra av teimum seks deildunum. Tey starvsfólk, ið eftir ætlan verða ávirkað av hesum broytingum, hava kortini fingið tilboð um annað starv í Uttanríkisráðnum.
Ætlanin er at seta tvær nýggjar deildir á stovn. Onnur deildin fer at marknaðarføra Føroyar, serliga sum ferðamál. Hin deildin fer at samráðast um handil og tilfeingi.
Tað er ætlanin at lýsa leys hesi bæði nýggju deildarstjórastørvini í næstum.
