Varaverjumálaráðharrin í Ukraina, Hanna Malyar, skrivar á Telegram í dag, at ukrainski herurin seinasta samdøgrið nú hevur tikið sjey bygdir aftur.
Hanna Malyar sigr, at tær seinastu bygdirnar, sum ukrainski herurin hevur tikið, eru Lobkovo, Levadne og Novodarivka í Zaporizjzja-regiónini.
- Vit hava eisini tikið bygdina, Storozjeve í Donetsk, umframt tær tríggjar bygdirnar vit tóku sunnudagin, leggur hon aftrat.
Varaverjumálaráðharrin sigur, at landaøkið, sum ukrainski herurin hevur tikið aftur frá russum í hesum umfari, snýr seg um tilsamans 90 ferkilometrar.
Tað er tíðindastovan NTB, sum ber hesi tíðindi, sum eitt nú norska kringvarpið NRK endurgevur. Tíðindini eru ikki váttað av óheftum keldum.
