Forsetin í FSF er sum vera man errin av U17, nú teir hava spælt seg víðari til EM endaspælið. Hetta tí, at tað merkir, at Føroyar eru millum 16 tey bestu innan U17 fótbólt í Evropa.
- Tað er ófatiliga flott, sigur Christian Andreasen og vísir á, at hendan føroyska sensatiónin hevur skapt umrøður í evropeiska fótbóltsheiminum.
- Tað er fyrstu ferð, at eitt so lítið land kvalifiserar seg til EM endaspælið, sigur Christian Andreasen.
Men hvussu ber tað til, at hesin árgangur av fótbóltsleikarum í Føroyum hevur megnað tað, sum eingin undan teimum hevur megnað.
- Hetta er uttan iva eitt úrslit av einum langum, miðvísum arbeiði við hesum árgangi, sigur Christian Andreasen.
Og eingin ivi er um, at føroyingar hava gott í vænti fyri fótbóltsframtíðina.
- Hetta er ein óvanliga góður árgangur og eg vænti tað fer at síggjast upp gjøgnum rekkjurnar, sum teir gerast eldri, sigur Christian Andreasen.
