Í gjár var 2. jóladagur, og 2. jólakvøld er vanliga eitt kvøld, har nógv fólk eru í býnum. Soleiðis var eisini í gjárkvøldið og í nátt, veit løgreglan at siga í morgun.
Vaktleiðarin sigur, at rættiliga nógv fólk var í býnum í Havn í nátt, og her vóru eisini nakrar uppgávur, har løgreglan mátti hjálpa fólki til hús, sum svóvu úti.
- Vit hava verið sjónligir í náttarlívinum í nátt, men tað er nú einaferð soleiðis, at vit kunnu ikki vera allastaðni í senn.
Eftir at skeinkistøð lótu aftur í nátt, vóru tvey harðskapsmál skrásett í Havn, men í løtuni vil løgreglan ikki siga stórvegis um hesi mál.
- Men, her er talan um tvey greið harðskapsmál, har avhoyringar skulu gerast, og hetta eru mál, sum vit fara at arbeiða við í dag.
Sum skilst á vaktleiðaranum í morgun eru ongar handtøkur framdar í hesum málum enn.
