Tveir ráðharrar í norsku stjórnini, umhvørvis- og menningarmálaráðharrin Erik Solheim og kenslumálaráðharrin Tora Aasland, eru farin úr stjórnini. Bæði eru úr Sosialistiska Vinstraflokkinum, og sambært norskum fjølmiðlum eru tey trýst út.
NRK veit at siga, at tey bæði fingu at vita í morgun, at teirra dagar í stjórnini vóru taldir, og at tað var tann nývaldi formaðurin í SV, Audun Lysbakken, sum gav teimum boðini. Tann almenna frágreiðingin sigst vera, at nýggjar kreftir skulu framat.
Erik Solheim er ikki hvør sum helst í norskum politikki. Hann gjørdist formaður í ungmannafelagnum hjá SV í 1977, og hann var formaður í flokkinum í 10 ár.
