Tað hevur verið rættiliga nógvur vindur í gjárkvøldið og í nátt – og tað er framvegis nógvur vindur.
Men løgreglan sigur, at tey hava ongar fráboðanir fingið um stormskaðar. Tó so hevur vandi verið á ferð tvær ferðir. Í fyrra førinum stúrdu fólk fyri einum byggipalli í Hoyvík, men tað fekk sløkkiliðið boð um, so har frættist einki aftur. Í hinum føri var boðað frá, at tekjan á eini garasju í var við at fara, men eigarin segði, at hann fór sjálvur at bjarga tekjuni, so har hoyrdist heldur einki aftur.
Tað er framvegis ringt veður, og løgreglan heitir tí á fólk um at ansa sær. Fyri eini løtu síðani vístu veðurstøðirnar hjá Landsveki hesar vindmátingar kring landið.
Klaksvík, Gerðabøur - Stívt andøvsgul, í hvirlunum upp til 28 m/s
Syðradalur - Hvassur vindur, í hvirlunum upp til 31 m/s
Gjáarskarð - Hvassur vindur, í hvirlunum upp til 31 m/s
Kambsdalur - Stívt andøvsgul, í hvirlunum upp til 26 m/s
Heltnin, Oyndarfjarðarvegurin - Skrið, í hvirlunum upp til 41 m/s
Tjørnuvíkarvegurin - Hvassur vindur, í hvirlunum upp til 26 m/s
Streymnes - Skrið, í hvirlunum upp til 27 m/s
Norðuri í Sundum, Kollafjørður - Skrið, í hvirlunum upp til 26 m/s
Høgareyn - Stormur, í hvirlunum upp til 32 m/s
Á Sandavágshálsi - Andøvsgul, í hvirlunum upp til 31 m/s
Sandoy, á Brekkuni Stóru - Skrið, í hvirlunum upp til 25 m/s
Ørðaskarð, Fámjinsvegurin - Hvassur vindur, í hvirlunum upp til 27 m/s
Men nú minkar vindurin skjótt og út á fyrrapartin, og nakrar dagar fram, verður lítil og eingin vindur.
