Alibátar
Tað er ikki langt síðan, at KJ-Hydraulik læt ein nýbygning til Pan Fish í Oyndarfirði – ein alibát av slagnum, Hydro-Cat, ið nú er vørumerkið hjá hesum bátum.
Skrokkarnir eru smíðaðir í Letlandi, og síðan hevur KJ gjørt bátarnar lidnar í leigaðum hølum hjá Skarðhamri á Borðoyarvík.
Tað er KJ, sum eigur alt konseptið upp á alibátarnar, ið eru designaðir og teknaðir á Kambsdali.
Fleiri sáttmálar
Alivinnan hevur tikið væl ímóti hesum bátum og hevur nú bílagt fleiri bátar.
Tvíkiljan, sum KJ hevur latið Pan Fish í Føroyum, er soleiðis hin fyrsta av trimum í hesum umfari.
- Skrokkur nr. 19 er liðugur, og báturin kemur heim til Føroya í næstum. Um stutta tíð verður eisini farið undir skrokkin til nýbygning nr. 20. Tað er Luna í Gøtu, sum skal hava hesar báðar bátarnar, sigur Sofus Gregersen, marknaðarleiðari hjá KJ.
Fyrri skrokkurin hjá Luna var longu komin til Føroya, tá tvíkiljan hjá Pan Fish varð flotað á Borðoyarvík, og næsti skrokkurin hjá gøtumonnum fer væntandi úr Letlandi í komandi viku.
- Vit fáa skrokkarnar heim við Skipafelag Føroya, og tað tekur einar 2-3 mánaðir at gera teir lidnar á Skarðhamri.
Nú hevur KJ-Hydraulik so gjørt sáttmála um enn ein Hydro-Cat, sum verður nýbygningur nr. 21.
- Tað er Funnings Laks, sum skal hava hesa tvíkiljuna, og soleiðis verður talan um tilsamans fýra bátar í hesum umfari, sigur marknaðarleiðarin.
Hann vísir á, at tekningarnar til hesar seinnu bátarnar eru á leið tær somu, sum felagið áður hevur bygt, men teir nýggju verða nakað longri. Breiddin verður hin sama.
Samráðingar
- Umframt hesar fýra tvíkiljurnar, sum vit nú hava smíða og skulu smíða til alivinnuna í Føroyum, eru samráðingar í gongd um aðrar slíkar bátar. Vit vænta tískil ikki, at hesir fýra alibátarnir verða teir seinastu í røðini, sigur marknaðarleiðarin, sum er sera fegin um, at alivinnan í Føroyum hevur tikið so væl ímóti hesum bátunum.
Nýggi bátarnir verða 15 metrar langir, seks metrar breiðir, og maskinorkan verður nakað størri.
- Jú, hetta sær ógvuliga spennandi út, ásannar Sofus Gregersen.
KJ og teir, sum eiga smiðjuna á Skarðhamri á Borðoyarvík, hava samstarvað í fleiri ár, og nú hava hesi feløgini saman við Heðini Poulsen stovnað nýtt felag, Sandblástur í Ljósáum, sum rekur virksemi við sandblásing, metalisering og máling.
Undirveitarar
- Felagið veitir soleiðis sandblásing, metalisering og máling bæði umborð á skipum og bátum og á staðnum. Hetta felag er soleiðis eisini ein av undirveitarunum hjá KJ, nú vit byggja tvíkiljurnar til alivinnuna, sigur Sofus Gregersen, marknaðarleiðari.
Aðrir undirveitarar í sambandi við hesa nýbygging eru Jón Jacobsen, Eiði, P/F J-El Sp/f, Eiði og Radiobúðin, Saltangará.
KJ setir motorar, gear, krana og spøl í bátarnar, meðan felagið soleiðis hevur undirveitarar til eitt nú sandblásing, metalisering og máling, eins og til apeteringsarbeiði, el-útbúnaðin og nautisku instalatiónirnar.
Tað var upprunaliga Hydro-Tech á Eiði, sum í síni tíð byrjaði at byggja tvíkiljur til alivinnuna, men tá alivinnan fór fyri bakka, gekk hetta eisini útyvir virksemið á Eiði, sum síðan varð lagt undir KJ-Hydraulik.
Hydro Cat
Føroysku alibátarnir, sum Hydro Tech smíðaði, vóru væl umtóktir í alivinnuni, og tí hevur KJ valt at kalla tvíkiljurnar Hydro-Cat.
Bátarnir eru sterkir, eins og útbúnaðurin umborð er tilsvarandi til dygdar. Skrokkarnir eru smíðaðir úr stáli, og húsið úr aluminium.
