Frá í morginári at rokna er tryggingarfelagið Trygd flutt úr gomlu Sjóvinnubankahølunum í Gongini í Havn niðan í høvuðssætið hjá BankNordik í Húsagøtu í Havn.
Tað er sjálvsagt við sorgblídni, at vit siga farvæl til ein av landsins bestu bústøðum, men vit síggja stórar fyrimunir fyri Trygd við at flyta tættari at móðurfelagnum BankNordik. Vit hava samstarvað væl hvønn dag um eitt nú sølu av tryggingum, men við at flyta tættari saman, meina vit, at samstarvið fer at gerast enn betri og meira effektivt á fleiri økjum, sigur Janus Thomsen, stjóri.
Janus Thomsen vísir eisini á, at tað serliga er ein stórur fyrimunur fyri eitt lutfalsliga litið tryggingarfelag sum Trygd, at kunna lena seg tættari at eini størri og sterkari fíggjarfyritøku, sum BankNordik er, hvat stápsfunktiónum viðvíkur.
Síðani ár 2000 hevur Trygd búleikast í søguligu hølunum í Gongini 7.
Trygd lat annars upp í hølunum í Tórsgøtu 16 í februar 1998. Tá varð Trygd endurstovnað og fekk aftur loyvi at selja tryggingar, eftir at Tryggingarfelagið Føroyar hevði havt monopol á føroyska marknaðinum síðani seinna veraldarbardaga.
Trygd hevur 24 starvsfólk, sum hereftir koma at hava sín arbeiðsstað í Húsagøtu 3.
