Áhugin at vera valdur í nevndina í Starvsmannafelagnum er óvanliga stórur hesaferð. Hetta varð greitt, tá ið uppstillingarfreistin var úti á miðnátt.
Starvsmannafelagið boðar frá, at tað verður rættulig kapping um nevndarsessirnar, sum standa fyri vali á áðalfundi Starvsmannafelagsins 5. mars.
– Sjáldan, um yvirhøvur nakrantíð fyrr, hevur áhugin, at stilla upp verið so stórur sum í ár, skrivar felagið.
Tríggjar kvinnur og tríggir menn bjóða seg fram, og skulu tey kappast um tveir nevndarsessir, sum standa fyri valið hesaferð.
Tey, sum stilla upp eru hesi:
- Gunnar Hjelm, starvast á Sjúkraflutningstænastuni á Landssjúkrahúsinum.
- Harald H. Haraldsen, starvast á Landssjúkrahúsinum.
- Alma Hansen, starvast á Tannlæknastovuni hjá Tórshavnar Kommunu.
- Karin Jacobsen, starvast hjá Tórshavnar kommunu.
- Jóngerð Simonsen, starvast á Akstovuni.
- Hilmar Augustinussen, starvast á Gjaldstovuni.
Nevndarlimir verða valdir fyri trý ár í senn, og frammanundan er greitt, at tveir nevndarsessir skulu mannast av nýggjum á aðalfundinum 5. mars.
Nevndarvalið verður á aðalfundinum í Norðurlandahúsinum 5. mars, og tá verður somuleiðis formansval á skránni.
Sum nakað nýtt skipar Starvsmannafelagið hesaferð fyri talgildum undanvali til formans- og nevndarvalini. Hetta er eitt høvi hjá limum felagsins, ið ikki koma á aðalfundin at greiða atkvøðu.
Undanvalið byrjar 15. februar og til ber at velja til fríggjadagin 4 mars. kl. 15.
