Jan Müller
Tað er ikki ómøguligt, at lønandi oljufund verða gjørd í Grønlandi komandi árini, hóast tað vórðu boraðir millum 30 og 35 brunnar bæði í Norðsjónum og í New Foundlandi, áðrenn lønandi fund vórðu gjørd. Hetta heldur stjórin í almenna grønlendska oljufelagnum, Nunaoil, Hans Christian Olsen.
– Vit mugu sjálvandi vera tolin, nú bert fáir brunnar eru boraðir higartil, men eg vóni og eg trúgvi uppá, at tað verða gjørd fund sigur hann og vísir á, at tað kundi verið spennandi og áhugavert, um olja og gass varð funnið í Grønlandi og Føroyum um somu tíð.
Skotska oljufelagið Cairn Energy, sum boraði tríggjar brunnar í vesturgrønlandi í fjør og staðfesti bæði olju og gass, fer at bora tríggjar brunnar aftrat í summar. Hoyrið meira um áhugaverdu og spennandi oljutilgongdina í Grønlandi í morgunsendingini á Rás2 mánadagin kl. 9.15, tá vit fara at senda alla samrøðuna Jan Müller hevur við grønlendska oljustjóran. Í samrøðuni verður eisini tosað um samstarvsmøguleikar á oljuøkinum millum Grønland og Føroyar.
