Vit vilja hervið mótmæla ætlanini hjá formansskapinum í
Tað er í øllum førum ein sannroynd, at kvinnuumboðanin við seinasta val øktist úr 9% til góð 21%, og at henda framgongd hendi samstundis, sum valskipanin varð broytt frá 7 valdømum til 1 valdømi.
Tað er eisini ein sannroynd, at um vit síggja burtur frá nøkrum fáum undantøkum, so vórðu kvinnur, við undanfarnu valdømisskipan, bert valdar á Løgting í størsta valdøminum - Suðurstreymoyar valdømi. Trupulleikin tykist verða, at kvinnur ógvuliga sjáldan fáa flestar atkvøður á teimum einstøku listunum, og so eru møguleikarnir so at siga eingir fyri at verða valdar í teimum smærru valdømunum. Tað hevði tí verið upplagt, at formansskapurin í Løgtinginum í sambandi við arbeiðið at fyrireika uppskot til broyting í valskipanini, tók atlit til hesi viðurskiftir. Hóast uppskotið leggur upp til 5 og ikki 7 valdømir, so er hetta neyvan nóg mikið fyri at loysa henda trupulleika
Í útvarpssamrøðu greiddi Løgtingsformaðurin frá sínum ekka fyri, at um valskipanin ikki verður broytt aftur nú beinanvegin, so skulu vit ikki telja longur enn eitt val fram, so eru øll okkara umboð í Løgtinginum úr Suðurstreymoyarøkinum. Fyri at forða fyri hesi gongd, heldur løgtingsformaðurin, at tað er neyðugt at áseta økiskvotur. Vit vilja tí hervið spyrja løgtingsformannin, hví hann ongan ekka hevur av, at føroyskar kvinnur, sum útgera helvtina av fólkinum í Føroyum, eru so margháttliga undirumboðaðar, sum vit eru. Hví er tað, harra formaður, at ganga veljaranum ov nær, um vit áseta kynskvotir, sum tú valdi at taka til, men ikki um vit áseta økiskvotir? Er tað ikki upp til veljaran at avgera, hvussu Føroyar geografiskt skulu verða umboðaðar í Løgtinginum?
Vit krevja tí, at um Løgtingið fer at viðgera uppskot um at broyta valskipanina við at innføra økiskvotir, so skulu atlit eisini takast til, hvussu vit tryggja kvinnuumboðanina á Føroya Løgtingi, eitt nú við kynskvotum.
Í Løgtinginum í dag hava 28 menn og 5 kvinnur hvør sína atkvøðu. Uttan mun til, hvat fyri grundgevingar verða nýttar fyri at atkvøða fyri ætlaða uppskotinum, so kann ein atkvøða fyri hesum uppskoti ikki skiljast sum annað enn ein roynd uppá at lóggeva kvinnur út aftur úr Løgtingum. Um so verður, so er í øllum førum staðfest, at vit ikki hava fólkaræði í Føroyum.
Jenny Kingbo, Katrin Gaard, Eva H. Bennicke, Ann Damgaard, Margit Stórá, Doris Bjarkhamar og Hallbera Fríða West.
