Almannaverkið skrivar, at tilboðið inniheldur fysioterapeutiska og ergoterapeutiska venjing, umframt taluvenjing, sum eftir tørvi kann samskipast við deildina Samskiftismenning.
Venjingin kann innihalda:
- Kropsliga venjing
- Venjing í gerandisaktivitetum
- Kognitiva venjing
- Meistring og handfaring av avbjóðandi støðum í gerandisdegnum
Viðlíkahaldsvenjing hevur til endamáls at fyribyrgja førleikamissi, fasthalda verandi førleika ella fyri at seinka sjúkugongdina. Viðlíkahaldsvenjing verður í høvuðsheitum veitt sum bólkavenjing.
Umframt viðlíkahaldsvenjing bjóða vit framvegis endurvenjing. Mett verður í hvørjum einstøkum føri, hvat rætta tilboðið er.
Umsóknarblaðið til venjing og kunning liggur á heimasíðuni hjá Almannaverkinum.
Um spurningar ella ivamál eru, ber til at seta seg í samband við deildina Venjing hjá Almannaverkinum á tlf. 360000. Deildin svarar mánadag - hósdag 10.00-15.00 og fríggjadag 10.00-13.00.
