Tað er fallið nógvum fyri bróstið, at eingin EM-fótbóltsdystur er blivin vístur á trappuni í Vágsbotni í summar. Tað er eftir hondini blivin siðvenja, at trappan savnar nógvar fótbóltsglaðar føroyingar til stórar og spennandi fótbóltsdystir. Men ikki í ár.
Orsøkin til hetta er sum skilst, at arbeitt verður við at breiðka atløgusíðuna í Vágsbotni - og hetta skal vera klárt, áðrenn drotningin kemur 15. juli.
Føroya Tele plagar at skipa fyri at vísa dystirnar á trappuni, og tey hava gjarnað viljað gjørt tað aftur í ár. Hjá fyritøkuni AVlux hava tey fegin viljað lagt skerm til, men svarið frá kommununi hevur verið noktandi.
Og kommunan vil eftir øllum at døma eisini vísa dystirnar, frætta vit frá Snarskivuni. Men sum vit skilja frá kommununi, so hevur Articon mælt frá at seta skerm og annað upp, tí tað kann órógva arbeiðið hjá teimum í Vágsbotni. Tað ber ikki til at hava lastbilar, gravkýr, stórskerm og so stóra fólkamongd á sama staði, ljóðar grundgevingin.
– Trupulleikin er, at vit mugu brúnna við fiskatorgið lidna, áðrenn drotningin kemur. Articon segði, at um eg valdi stórskíggjafótbólt fram um, ja so bleiv tað ikki liðugt rættstundis. So eg mátti velja, sigur Heðin Mortensen, borgarstjóri.
Men nú er finalan ein sunnudag, og tá arbeiða teir helst ikki.
– Ja, eg rokni ikki við, at teir arbeiða tá. Eg kann royna at spyrja teir, hvat ber til, sigur Heðin Mortensen og leggur aftrat, at tá tað er eitt arbeiðspláss, so eru nakrar trygdarásetingar eisini.
Vit hava spurt okkum fyri hjá Articon, og tey hava sum so onga meining um hetta, men vilja bara gera arbeiðið liðugt uttan órógv, áðrenn drotningin kemur 15. juli.
Sum vit duga at síggja úr Miðlahúsinum, er saktans pláss til at skipa fyri stórskíggjafótbólti í Vágsbotni. Hygg bara her:
##med2##
