Víkingur skrivaði í kvøld føroyska fótbóltssøgu, tá teir sum fyrsta føroyska lið nakrantíð megnaðu at leika seg víðari til triðja umfar av Europa League. Eitt frálíkt bragd fyri føroyskan fótbólt.
Víkingur hevur higartil leikt allar sínar evropeisku dystir á Svangaskarði, men í triðju rundu noyðist Víkingur at leika á Tórsvølli.
Orsøkin til at Víkingur má leika á Tórsvølli, er tí at Svangaskarð ikki lýkur krøvunum, til at leika í triðja umfari av Europa League. Svangaskarð er í tí bólkinum, sum kallast bólki 2, meðan Tórsvøllur er í bólki 3. UEFA hevur eitt minsta krav til triðja umfar, ið eitur at allir dystirnir skulu leikast á leikvøllum, ið eru bólki í 3.
Tískil spælir Víkingur á Tórsvølli hóskvøldið tann 31 juli. Mótstøðuliðið hjá Víkingi er kroatiska liðið HNK Rijeka.
