Tað eru tveir mans í Skúvoy, sum eru avgreiðslumenn hjá Strandfaraskipum Landsins, tá Sildberin kemur við ferðafólki og farmi. Menninir arbeiða eina viku í senn og hava so frí í eina viku.
Tað er ikki óvanligt, at avlýsingar eru um vetrarnar, tá ikki slepst at í Skúvoy fyri súði ella brimi. Soleiðis hevur eisini verið í vetur, og í januar vóru nógvir dagar, har Sildberin ikki sigldi.
Um summarið er nógv meira at gera, enn tað er um veturin, tí tá eru lutfalsliga fáar avlýsingar, og tá eru eisini nógv fleiri ferðafólk á farleiðini um Skúvoyarfjørð.
##med3##
Gott samstarv
SSL-avgreiðslumenninir í Skúvoy hava eitt gott samstarv við teir, sum sigla við Sildberanum. Er ivaveður, eru tað menninir í Skúvoy, sum lata manningini boðini um líkindini í Skúvoy.
Nakrir túrar hjá Sildberanum eru tilkallitúrar, og aðrir eru ikki.
Túrarnir klokkan 8.30 gerandisdagar eru fastir, tá siglandi er, og hesir verða róptir posttúrar. Síðan eru tveir fastir farmatúrar, ávikavist týsdag og hósdag, og hesir eru tíðliga seinnapartin.
Men, tað er ikki altíð so lætt at vera teir í Skúvoy, sum skulu taka støðu til, um komandi er at hjá Sildberanum í Skúvoy. Sjóvarfallið hevur stóra ávirkan, og tú kanst skjótt gerast lumpaður av líkindunum.
##med4##
Tað kemur fyri, at avgreiðslumenninir biðja Sildberan koma, men so broytist kyrran knappliga til ókyrru, og teir noyðast at biðja teir venda aftur til Sands.
Tað eru eisini eru dagar, har tað sær keðiligt út, og har manningin verður biðin um ikki at koma við Sildberanum, men at tað so kortini vísir seg at vera hampilig líkindi.
Tað einfaldasta er, tá tað er illveður og brim, tí tá skilja øll, at tað eru ikki líkindi. At ivast í, hvørt tað er komandi at í Skúvoy ella ei, er tað keðiligasta við uppgávuni hjá avgreiðslumonnunum.
##med2##
Lagalig manning
Manningini á Sildberanum er lagalig. Er farmur aðrar dagar enn týsdag og hósdag, taka teir eisini farmin út við aðrar dagar í vikuni.
Í Skúvoy eru tey sum heild glað fyri Sildberan, sum er eitt munandi betri skip at sigla við, enn gamli Sildberin var. Hinvegin skerst ikki burtur, at gamli Sildberin lá nógv betur við bryggjuna teir keðiligu dagarnar, enn hesin báturin ger.
Hin gamli, sum lá tungur í sjónum og stakk djúpt, lá líka sum eitt sker við bryggjuna. Núverandi Sildberin stingur ikki so djúpt og liggur meira livandi við byggjuna, tá tað er ókyrt.
Tað er tó neyvan nakar skúvoyingur, sum vildi verið núverandi bátin fyriuttan, tí hesin bæði rullar minni, siglir skjótari, samstundis sum ferðafólkarúmið umborð er gott og tíðarhóskandi.
