Tað er ikki bara skúlin á Skúlatrøð í Klaksvík, sum er raktur, nú korona herjar Klaksvíkina.
Støðan við koronu ávirkar eisini tænasturnar og tilboðini hjá Norðoya Bú-og Heimatænastu.
- Vit harmast sjálvsagt støðuna, men vit taka øll neyðug atlit, so tilboðini skjótt kunnu gerast virkin aftur, sigur leiðslan í bú-og heimatænastuni við heimasíðuna hjá Klaksvíkar kommunu í dag.
Heitt verður á avvarðandi og onnur um at fylgja teimum tilmælum, sum leiðslan hevur sett út í kortið. Hesi tilmæli kunnu eisini lesast á heimasíðuni hjá Norðoya Bú-og Heimatænastu - www.nbh.fo
Sagt verður um talið av vitjandi á búeindum undir heimatænastuni, at her kunnu tvey fólk vitja hvørt búfólk.
- Eftir ráðgeving frá koronuráðgevingini verður tað eisini soleiðis, at vitjandi skulu vera koppsett og hava negativa test, sum í mesta lagi er 48 tímar gomul.
Lagt verður aftrat, at um talan er um serligar umstøður, kann víkjast frá hesum eftir avtalu við deildarleiðaran.
- Vitjanin skal fara fram á kømrunum, og vitjandi vitja bert síni avvarðandi, siga tey í Norðoya Bú-og Heimatænastu.
Meira um, hvussu tey skipa seg innan eldraøkið í Norðoyggjum, nú korona herjar sum ongantíð áður, kann lesast um á áðurnevndu heimasíðu.
At enda verður lagt aftrat, at átøkini, sum nú eru galdandi, verða eftirmett mánadagin hin 8. november 2021.
