Tak frá okkum og lat hini fáa frið

– Hetta er spell!
Sigvald Kristiansen, for­maður í Lands­felag pensjón­istanna, harmast um, at sam­gongan enn einaferð hevur gjørt av at skerja livikorini hjá pen­sjónist­unum fyri at fáa hallið á fíggjar­lógini at minka.
Hann sigur, at enn hevur felagið ikki fingið uppskotið um at strika javn­ingina av pensjónum fyri næsta ár, til hoyringar.
Hinvegin ásannar hann, at vit eru mitt í sparitíðir og undir hesum um­støðum slepst ikki undan, at pen­sjón­istar eisini koma at merkja til spar­ingar.
– Men tað skal ikki raka teir, sum frammanundan eru ringast fyri, sigur Sigvald Kristiansen.
Í hesum sambandi sipar hann til teir pensjónistar, ið bara hava fólkapensjón og Sam­haldafasta, sum formliga eitur AMEG, at liva av.
– Tað eru tveir triðingar av pensjónistunum, ið onga aðra inntøku hava enn fólka­pensjón og AMEG at liva av. Og tað sigur seg sjálvt, at verður automatiska árliga hækkingin upp á 3%, sum skal byrgja upp fyri prís­hækkingum, eisini strikað, fer tað at merkjast væl hjá øllum hesum pensjónistunum.
– Tað merkir, at fólka­pensjónin fer at standa í stað, hóast prísirnir í samfelagnum uttan fara at hækka.
– Sostatt fer hetta at føra við sær, at keypiorkan og harvið livistøðið, hjá pen­sjónistunum, fer at lækka enn meiri.

Breiðir herðar
Ístaðin fyri at raka tey, sum bara hava vanliga fólka­pensjón og AMEG at liva av, skjýtur formaðurin í Lands­felag Pensjónistanna upp, at politikararnir friða teir pensjónistar, ið bara hava fólka­pensjón og AMEG, og ikki taka meiri frá teimum.
Skal nakað partú takast frá pensjónistum, eigur tað at verða tikið frá teimum, sum hava aðra inntøku afturat pensjónini og AMEG.
– Í slíkum førum eiga vit, sum hava góða pen­sjón afturat vanligu fólka­pen­sjón­ini, at tola, at betala tann partin eisini, so at teir pen­sjónistar, sum eru ringast fyri, fáa frið, sigur Sigvald Kristiansen.
Annars hevur Almanna­ráðið boðað frá, at uppskotið er sent avvarðandi pørtum til hoyringar.
Tá ið vit tosaðu við Sigvald Kristiansen, hevði ikki sæð lógaruppskotið, men hann væntar at Landsfelag Pensjónistanna er ein av­varðandi partur.
– Tá ið vit fáa uppskotið fara vit at viðgera tað og at siga okkara meining, sigur hann