Hvar og hvussu heldur tú nýggjár í ár?
- Sum altíð verður nýggjárið hildið í nýggjársbygdini, Vági. Hetta verður eitt øðrvísi nýggjár, nú tað mesta er avlýst, men eg gleði meg at hugna mær saman við familjuni við góðum mati og øðrum.
Tað sigur Ingun Poulsen í Vági.
Hvør var størsta hendingin - upplivingin - hjá tær í 2020?
- Størsta hendingin var at lata upp egna matstovu - matstovuna Garðslon í Vági - og hetta hendi júst á mínum føðingardegi hin 5. juni.
Og hvat var tað keðiligasta í 2020?
- Tað keðiligasta í árinum má vera, at covid-19 legði land okkara og allan heimin lamnan. Eg plagi at ferðast nógv, so hetta hevur verið eitt undarligt ár.
Hvørjar vónir hevur tú fyri 2021?
- Eg vóni og krossi fingrar fyri, at vit aftur kunnu fáa ein so vanligan gerandisdag sum gjørligt, nú koppingarevnið er komið. Eg vóni eisini, at øll míni nærmastu koma væl inn í nýggja árið.
Gevur tú eitt nýggjáarslyfti?
- Mítt nýggjárslyfti er, at eg ikki ætli mær at eta so nógv søtt í nýggja árinum, sigur Ingun Poulsen brosandi.
##med2##
