SAMRØÐA
?Nei, eg angri ikki, at eg søkti, sigur Steffen Stummann Hansen.
Svarið gevur kanska seg sjálvt, tá hann nú situr yvirav okkum í besta kontórinum hjá Føroya Fornminnissavni í frálíka vøkru náttúruni í Gomlu Hoyvíkini.
Hann byrjaði í starvinum mánadagin. Men føroyingar kenna hann longu. Hann hevur verið at kalla mest umtalaði maður í føroysku fjølmiðlunum seinastu mánaðirnar.
Hann roynir heldur ikki at fjala útyvir, at hann fegin vildi sloppið undan at verið so nógv í yvirskriftunum.
Men í Føroyum er gott at vera, heldur Steffen Stummann Hansen, sum ein stóran part av áttatiárunum búði í Føroyum í sambandi við útgrevsturin við Toftanes í Leirvík.
Og hann býr nú aftur í Leirvík. Hann hevur leigað sær eini hús, og hvønn morgun ferðast hann teinin úr Eysturoynni til Havnar. Hóast tað er ein tími at koyra, so hugsar Steffen ikki, at hetta er nakað at hugsa stórvegis um.
?Eg kenni væl Leirvík frá útgrevstrinum í áttatiárunum, og mær dámar eisini væl í Leirvík, sigur Steffen Stummann Hansen.
Sostatt fær nógva rokið ikki Steffen Stumman Hansen at halda seg burtur.
Hann virkar eisini rættiliga lítið ávirkaður av rokinum, tá hann situr yvirav okkum og svarar spurningum.
Hvussu hevur hesin danski fornfrøðingurin so upplivað at standa ovast á breddanum næstan uttan íhald?
?Lat meg siga, at tað hevur ikki verið stuttligt. Tá eg havi verið í Danmark, so havi verið eitt sindur vekk frá øllum og havi sostatt ikki lisið alt, sum er skrivað, men eg eri sjálvandi vitandi um alt rokið, sigur Steffen Stummann Hansen
Og tað skal ikki vera nakar ivi um, at Steffen Stummann Hansen fegin vildi verið sloppin undan øllum rokinum.
?Eg søkti jú bara eitt starv sum onnur. Hetta er tað einasta, eg havi gjørt. Tann nógva umtalan er komin aftaná, og tað er nakað, eg fegin vildi verið sloppin undan, sigur Steffen Stummann Hansen.
?Alt hetta stríðið hevur verið slítandi fyri allar partar, sigur Steffen.
Tá vit spyrja hann, um hann allatíðina hevur verið líka vísur í at taka av tilboðnum, so hvørt sum stríðið um hansara setan vaks, er hann ikki so skjótur at svara.
?Tað er ringt at siga, hvat eg havi hugsað alla hesa tíðina, men eg tók jú eina avgerð, tá eg søkti starvið, og eg haldi fast við mína avgerð, sigur Steffen Stummann Hansen.
Hann er fluttur úr Danmark og búsett seg í Føroyum við einum sáttmála fyri fimm ár.
Áðrenn hann kom til Føroya starvaðist hann hjá Nationalmuseumet í Keypmannahavn, har arbeiddi við at gera bøkurnar um útgrevsturin á Toftanesi lidnan.
Hann hevur eisini tvær aðrar bøkur klárar at geva út við støði í eldri útgrevstrum í farnu øld.
Lærdi háskúlin í York fer seinni at útgeva eina bók hjá honum um víkingatíðina, og hvussu hetta var við at skapa eitt føroyskt samfelag.
Hann skilur tað mesta av føroyskum, og hann ætlar sær at leggja eftir at fara at tosa hetta sama mál sum skjótast.
?Mær dámar ógvuliga væl í Føroyum, og so er hetta eisini fakliga avbjóðandi, sigur Steffen.
Hann hevur enn ongi greið boð um, hvussu tað fer at merkjast, at nýggjur stjóri er komin á Føroya Fornminnissavni, men hann vil fegin eitt nú gera sambandi við bygdasøvnini betri og gera savni í Hoyvík meira sjónligt.
?Hesa næstu tíðina fari eg at nýta at seta meg væl inn í tingini og mannagongdir her á stovninum, sigur Steffen Stummann Hansen, sum eisini hevði fingið nøkur blomstur á borðið hjá sær, hóast fráboðanir vóru um eina kalda móttøku.
Til tað, at starvsfólkini á Fornminnissavninum framvegis ynskja starvsetanina ógildaða, hevur Steffen ikki so nógvar viðmerkingar og sigur bert, at hann er komin at gera arbeiðið, hann er settur til at gera.
Mynd: Steffen Stummann Hansen er farin til verka, og alt bendir á, at hann eisini kann vera sitandi hesi fimm árini, um hann vil.
Sjálvur er hann glaður fyri at vera í Føroyum, men nógva rokið vildi hann fegin verið sloppin undan.
