Sveisiski miðbankin, SNB, hevur í dag lækkað rentuna við 0,25 prosentstigum til null prosent.
Tað boðar SNB frá í tíðindaskrivi.
Hetta ger, at Sveis verður fyrsta landið í Evropa, sum enn einaferð hevur eina rentu á null prosent.
Ólíkt nógvum øðrum miðbankum stríðast sveisarar við, at inflatiónin í landinum er ov lág.
Í sambandi við rentulækkingina vísir miðbankin á, at inflatiónstrýstið er minkað í mun til undanfarna ársfjórðing.
Í februar var inflatiónin upp 0,3 prosent, meðan hon var minus 0,1 prosent í mai, skrivar SNB. Minkingin stavar serliga frá prísgongdini á ferðafólka- og oljuvørum.
Við at lækka rentuna vil SNB standa ímóti lægra inflatiónstrýstinum.
Sambært leiðandi búskaparfrøðinginum í Sydbank Kim Blindbæk verður inflatiónin í Sveis drigin niður av innfluttum vørum, tí sveisiski frankurin er sterkur.
- Sveisiski frankurin virkar sum eitt trygt friðskjól á fíggjarmarknaðunum, og íleggjarar søkja tí Sveis, tá aldurnar eru høgar á marknaðunum, skrivar hann í viðmerking.
Ófriðurin og óvissan seinastu tíðina í sambandi við tollhóttanirnar hjá Trump og støðuna í Miðeystri hava tí fingið íleggjarar at keypa sveisiskar frankar upp, greiðir Kim Blindbæk frá.
Tá sveisiski frankurin styrknar mótvegis øðrum gjaldoyrum, gerast innfluttar vørur bíligari at keypa hjá borgarum í Sveis.
Kim Blindbæk vísir eisini á, at Sveis hevur eina drúgva søgu við lágari inflatión. Í 2022, tá Evropa var eyðkent av høgari inflatión, var inflatiónin í Sveis í hæddini við 3,5 prosentum.
Í Danmark var inflatiónin í hæddini í oktober 2022 við 10,1 prosentum.
/Ritzau/
