Stuðul frá krabbadýri til ravn

Jacob Vestergaard, lands­stýris­mað­ur í um­hvørvis­mál­um, hevur veitt fimm verkætlanum stuðul av játtanini til um­hvørvis­vernd­ar­tiltøk. Tá freistin at søkja um stuðul var úti, hevði Fiskimálaráðið fingið til­samans 18 umsóknir.
Tær fimm umsóknirnar, sum hava fingið stuðul, verða í stuttum lýstar soleiðis:
Heðin Joensen hevur fingið 30.000 krónur til verk­ætlan­ina “Bjálvandi betong­for­mar”. Talan er um betongformar úr flamin­go. Endamálið við verk­ætlan­ini er at lýsa, fylgja byggi­gongd­ini og máta orkunýtsluna av ein­­um nýggjum byggihátti í Før­oyum.­ Orkunýtslan skal mát­ast og samanberast við sið­bundna føroyska húsa­bygg­ing.
Jógvan Fróði Hansen hevur fingið 80.000 krónur til verkætlanina “Útbreiðsla og møgulig árin av innslødda krabba­dýrinum Caprella mutica í Føroyum”.
Krabbadýrið hoyrir náttúr­liga til í Japanska havinum. Í 2008 var krabbadýrið funn­ið fyrstu ferð í tveimum ymisk­um alibrúkum í Før­oy­um. Ikki er greitt, hvussu slag­ið er innsløtt til Føroya. Við kanningunum ber vænt­andi til at staðfesta, um krabba­dýrið hevur spjatt seg til onnur búøki, og um tað er ein hóttan móti øðrum djóra­sløgum.
Abraham Mikladal hevur fing­ið 90.000 krónur til verk­ætlan­ina “Ringmerking og gransking av ravni í Føroy­um”. Endamálið er at granska, hvussu ravnur - Corvus corax varius - búleikast í Føroyum, og á tann hátt fáa til vega meira vitan um ravnin. Enda­málið er at geva innlit í, hvussu ravnur búleikast, og hvørja ávirkan hann hevur á umhvørvi og náttúru, og hvørja ávirkan umhvørvi og náttúra hevur á ravnin. Tá verk­ætlan­in er liðug, verða gransk­ing­ar úrslit og vitan saml­að og útgivið á prenti og tal­gilt.
Klaksvíkar kommuna hev­ur fingið 100.000 krónur til verkætlanina “Burturbeina skøru­na”. Endamálið er at fáa tamarhald á skøruni í Klaks­vík, Ánunum, Strond og Norðoyri, sum er ein inn­slødd planta, ið hevur spreitt seg við fúkandi ferð. Plantan er sera ring at sleppa av aftur við, tá hon fyrst er komin.
Kommunufelagið hev­ur fingið 100.000 krón­ur til verkætlanina “Um­hvørvis­átak­ið 2014”. Endamálið við um­hvørvis­átakinum er at vek­ja áhugan og menna hug­burð­in millum føroyingar fyri føroysku náttúruni og um­hvørvi­num og eggja fólki at fara væl um. Átakið er skip­að sum kapping millum kommun­ur. Kappast verður um: Best røktu bygd, best røktu bygda- ella varðagøtu, best røkta neysta- og ella báta­pláss. Somuleiðis eru kapp­ing­ar­greinar um ársins grøna stovn og besta átak.

Agenda og RAMSAR
Harumframt hevur Fiski­mála­ráð­ið játtað 490.000 krón­ur til framhaldandi virksemi hjá Agenda 21 skrivstovuni, har endamálið er at styrkja Agen­da 21-arbeiðið úti í kommununum og stuðla, at tiltøk verða framd, sum verja og menna vitanina um um­hvør­við og náttúruna í samsvari við Agenda 21 yvir­lýs­ing­ina frá 1992.
Aftrat hesum hevur Fiski­­málaráðið játtað 210.000 krónur til framhald av RAMSAR-verkætlanini - við tí endamáli at skipa RAMSAR-verju av trimum búøkjum í Nólsoy, Skúvoy og Mykinesi hjá ávikavist drunn­hvíta, skúgvi, ritu, lom­viga og lunda.
- Hetta er ein verja, sum gagn­ar fuglinum, fólkinum og Føroyum. RAMSAR-verj­an verður løgd til rættis í tøttum samstarvi við fak­fólk, Fuglafrøðifelagið og fólk­ið, sum búleikast á nevn­du oyggjum, sigur Fiski­mála­ráðið.