Sunnudagin klokkan 11 fer Uni Næs, dómpróstur, at skipa Sverra Steinhólm í embætið sum dikonprestur. Hetta verður gjørt undir gudstænastuni í Fríðrikskirkjuni á Toftum.
Sverri Steinhólm hevur áður røkt embætið sum sjúkrahús- og fongsulsprestur. Hann verður fyrsti diakonprestur í Føroyum.
Uppgávan er at virka millum teirra, sum hava avbjóðingar í gerandisdegnum og gerast sosialt viðbrekin, eitt nú í mun til arbeiðsloysi, bundinskap ella heimloysi.
Sum dikonprestur skal Sverri Steinhólm virka í samspælinum millum tað einstaka menniskjað og samfelagið.
- Í arbeiðnum skal hann boða evangeliið um Jesus í orði og í verki inn í tilverunnar avbjóðandi umstøður.
Fólkakirkjan skrivar, at í fyrstu atløgu verður byrjað spakuliga í tættari samvinnu við Bláa Kross Føroya og Soli Deo Gloria í Klaksvík, ið eru umboðað í nevndini, sum saman við biskupi hevur ábyrgd av diakonprestinum.
Sverri Steinhólm hevur drúgvar royndir á økinum frá sínum arbeiði í Blá Krossi, har hann hevur verið virkin alt sítt lív og formaður í mong ár.
- Hann kemur at samstarva við felagsskapir og øll tey, ið ynskja at samstarva við Fólkakirkjuna. Væntandi verður talan um eitt samstarv, ið útinnar manngott arbeiði.
Fólkakirkjan hevur seinnu árini verið í eini tilgongd at seta fleiri funktiónsprestar at virka við meiri bundnum uppgávum, og setanin av diakonpresti er ein liður í hesum.
Sverri Steinhólm byrjaði í tænastuni sum diakonprestur tann 1. september. Sunnudagin verður hann skipaður í embætið, sum siðvenja er.
- Eftir gudstænastuna er ein drekkamunnur fyri øllum í Fríðrikskirkjuni, har høvið verður at heilsa uppá nýggja dikonprestin, veit Fólkakirkjan at siga í dag.
