Í Suðurafrika eru fólk sera misnøgd við, at ákæruvaldið hevur valt at ákæra 270 námsarbeiðsmenn fyri morð í sambandi við tilburðin, tá løgreglan skeyt 34 námsarbeiðsmenn og særdi 78 aðrar uttan fyri eitt nám nærhendis Johannesburg.
Løgmálaráðharrin, Jeff Radebe, er eisini misnøgdur við avgerðina hjá ákæruvaldinum, og hann bað í gjár ríkisákæran um eina frágreiðing um, hví ákæruvaldið hevur ákært teir 270 menninar.
Verjarnir hjá teimum ákærdu námsarbeiðsmonnunum hava skrivað forsetanum, Jacob Zuma, bræv, har teir krevja, at menninir verða latnir leysir úr varðhaldinum innan á middegi í morgin.
Lógin, sum ákæruvaldið hevur brúkt til at ákæra námsarbeiðsmenninar fyri morð, er frá 1956, og táverandi apartheidatýrið brúkti hana í stríðnum við tann svarta meirilutan. Sambært ákæruvaldinum var tað tann harðliga framferðin hjá námsarbeiðsmonnunum, sum gjørdi, at løgreglan skeyt teir 34 og særdi 78.
