Í dag hava Heðin Mortensen, formaður í Kommunufelagnum, Tórbjørn Jacobsen, næstformaður í Kommunufelagnum, Eyðgunn Samuelsen, landsstýriskvinna og Sirið Stenberg, landsstýriskvinna, skrivað undir sonevnda Markamótsskjalið.
- Við markamót verður hugsað um ymisk málsøki, har ábyrgdin hjá ymiskum myndugleikum umskarast. Neyðugt er tá at staðfesta, hvørjar meginreglur eru galdandi í ábyrgdarbýtinum millum partarnar, land og kommunur.
Tað sigur Almannamálaráðið í tíðindaskrivi í kvøld.
Lagt verður aftrat, at fleiri slík markamót eru millum kommunurnar, almannaverkið og sjúkrahúsverkið, og síðan útleggingin av eldrarøktini varð framd, eru nýggj markamót komin millum land og kommunur, eitt nú innan heimatænastu, stuðulstænastu, økispsykiatri og endurvenjing.
- Kommunur, sjúkrahúsverk og almannaverk tæna sama borgara. Partarnir hava felags ynski um støðugt at betra um almennu tænasturnar til borgaran.
Almannamannaráðið vísir á, at hetta krevur samstarv og samskipan millum myndugleikarnar.
- Markamótsskjalið leggur lunnar undir gott samstarv og samskipan millum myndugleikarnar, tá tænastur verða veittar borgarum. Við hesum skjali er kósin sett fyri, hvussu loysnir finnast, tá borgarar hava tørv á tænastum frá fleiri almennum myndugleikum.
At enda verður sagt, at komandi mánaðirnar verða neyvari vegleiðingar gjørdar, sum fara at gera handfaringina av markamótsmálum einfaldari, bæði hjá myndugleikum og borgarum.
- Partarnir fegnast um, at skjalið er undirskrivað. Nú kunnu vit koma víðari og geva borgarum eina betri og meira samanhangandi tænastu.
