- Øll partrolarapørini uttan tvey eru til fiskiskap. Skipini koma inn at landa, sum næsta vikan gongur. Fiskiskapurin hjá partrolarunum er fyri tað mesta smáligur.
Tað vita tey á Fiskamarknaði Føroya at siga. Lagt verður aftrat, at allir djúpvatnstrolararnir liggja við bryggju, og In.fo kann leggja aftrat, at tað hava teir gjørt seinastu tíðina.
Í gjár, tá tey á Fiskamarknaði Føroya gjørdu sínar metingar fyri næstu viku, vóru tríggir trolbátar til fiskiskap. Tveir fiska havtasku, og ein fiskar tosk og hýsu og fær eisini nakað av øðrum fiskasløgum.
- Vit vænta, at allir trolbátarnir koma inn at landa mánadagin. Vit vænta eisini, at trolbátar, sum liggja, fara út aftur í næstum.
Tvey garnaskip fiska svartkalva, og annað av hesum skipum kemur inn at landa mánadagin, og hitt kemur helst seinast í næstu viku.
- Fiskiskapurin hjá garnaskipunum, sum fiska svartkalva, er brúkiligur, men veiðan eftir havtasku er meira smálig, vita tey á Fiskamarknaði Føroya at siga.
