98 stig til Ísland. 80 stig til Føroyar.
Tað var endiliga úrslitið í landsdystinum millum Ísland og Føroyar, sum varð avgreiddur í Laugardalslaug svimjihøllini í Reykjavík leygardagin.
Tað var skjótt greitt, at íslendingar fóru at vinna.
Shaila millum Garðarnar, Pauli Ø. Mohr, Poula Ø. Mohr og Cecilia Eysturdal noyddust at geva avboð, orskað av arbeiði og øðrum. Kári á Høvdanum og Mona Simonsen, sum áður hava umboðað Føroyar í aljtóða høpi, eru givin at svimja, og tí vóru tey ikki við.
Ísland hevði allar svimjararnar, sum eru ovast á styrkislistanum í Íslandi, tøkar.
Føroyski hópurin var ungur. Tríggir vóru seninorar, fimm vóru juniorar, og hini átta eru eitt, tvey og trý ár undir veruligan junioraldur.
Ísland hevði 11 seniorar, tríggjar juniorar og tveir undir veruligan junioraldur í sínum hópi.
Vunnu greitt
Tað vóru oftast fleiri sekund, sum skiltu íslendingarnar frá føroyingunum.
Føroysku svimjararnir gjørdu hinvegin bart í liðsvimjingini á átta ferðir 50 metra frí. Tað var strævnasti teinurin í landsdystinum.
Næstbesta liðið hjá Ísland varð kolldømt, og Føroyar áttu tí ovasta og triðbesta liðið í hesi kappingini. Ísland misti øll síni stig, sum næstbesta liðið upprunaliga tryggjaði teimum.
Samanumtikið var íslendenski sigurin greiður. Í støðum var klassamunur. Serliga á breiddini vann Ísland fleiri stig. Tað sást serligt, tá bæði liðini vunnu hvør sínar seks einstaklingakappingar, og vinnandi stigini komu tí frá hinum plássunum og liðsvimjingunum.
Vunnu seinast
Tað er hinvegin ikki meira enn eitt ár síðan, at Føroyar vunnu samlaða landsdystin móti Íslandi. Tað var í Gundadali í Havn. Tá var úrslitið 101-79.
Tað er longu nú greitt, at liðini hittast aftur í oktober í 2011 í svimjihøllini í Gundadali.
