Fremmandafólk í Noregi, sum sýta fyri at læra síni børn at tosa norskt, skulu missa rættin til at ala børnini upp.
So langt er tann høgrasinnaði Framburðsflokkurin til reiðar at fara fyri at noyða tey fremmandu at laga seg til tað norska samfelagið. Ulf Erik Knudsen, sum er talsmaður hjá flokkinum í innflytaramálum, sigur við Aftenposten, at í veruleikanum er tað ágangur ímóti børnunum, tá foreldrini sýta fyri at læra tey norskt, áðrenn tey fara í skúla. Tey svíkja sína skyldur, sigur hann.
Tað er kortini lítið, sum bendir á, at Framburðsflokkurin fær undirtøku fyri sínum kravi. Talsfólk hjá hinum flokkunum siga við Aftenposten, at tey flestu foreldur vilja sínum børnum ta besta, og at uppskotið hevði ikki gjørt tað lættari at innlima tey fremmandu í tað norska samfelagið.
