Aftur í nátt hevur ódámligt herverk verið í Vági, har ótangar hava gjørt um seg við máling.
Hesa fer var tað skúlin, sum stóð fyri skotum, har onkur hevur málað ein stóran hakakross og ”Heil Hitler” og ”Hitler” við reyðari máling á skúlaveggin inni í skúlagarðinum.
Tað er málað við stórari skrift, umleið ein metur í hædd og tveir metrar í breidd, sigur løgreglan.
Fyri nøkrum nætrum síðani varð eisini herverk á kirkjuni á Vági, har onkur hevði málað orðið ”Satan”, tríggjar ferðir á kirkjudyrnar við reyðari máling.
Løgreglan sigur, at lítil ivi er um, at samanhangur er ímillum herverkið á kirkjuna og herverkið á skúlan.
- Vit hava staðfest, at talan er um somu máling, sigur løgreglan.
Løgreglan sigur, at herverkið er gjørt ímillum klokkan níggju í gjárkvøldið og klokkan sjey í morgun og hevur nakar sæð nakað óvanligt við skúlan hesa tíðina, eru tey vælkomin at siga frá.
Myndina tók Erik Christensen.
