Hetta tekur meiri enn eina lítla løtu at sodna.
B36 og KÍ vera í pottinum, tá ið tað fyrst í næstu viku verður drigin lutur um, hvørji skulu spæla ímóti í Europaliguni. Spurningurin er so, um føroysku liðini skulu spæla ímóti AC Milan, Tottenham ella kanska FCK.
Tá ið ein tími var farin á Tórsvølli í kvøld og støðan var 1-0 til Levadia, varð 21 ára gamli Hannes Agnarsson skiftur inn. Hann er kendur fyri umframt at vera góður fótbóltsspælari at vera sera skjótur og ágangandi, og fram ímóti dystarenda var tað hann, sum skoraði sigursmálið til 4-3, tá ið tað restaðu sjey minuttir, og stríðsmaðurin og tvímálaskjúttin Sebastian Pingel legði innfyri úr høgru.
-Eg dugi ikki at greiða frá tí kensluliga, men hetta var framúr fyri okkum allar. At verða skiftur inn í akkurát einum sovornum dysti var akkurát nakað fyri meg. Tað var nógv aftur og fram, og tað var ofta møguleiki fyri at bjóða av ein ímóti einum og sneiða seg leysan. Tað líkar mær væl, og vit eru ovurfegnir um, at tað eydnaðist, sigur Hannes Agnarsson.
Hann ásannar, at tað kundi farið báðar vegir:
-Teir høvdu onkrar støður, sum koppaðu okkum til fyrimunar, og vit høvdu støður, sum koppaðu teimum til fyrimunar, og tí var lættin so stórur, tá ið tað varð bríkslað fyri síðstu ferð, sigur skarprættarin Hannes Agnarsson.
Hvørjum droymir tú, at tit skulu spæla ímóti?
-Eg hevði einki havt ímóti at spælt ímóti einum liði, sum vit hava møguleika ímóti, men um tað ikki fer at bera til, so hevði tað verið hugaligt at hitt onkrar heimsstjørnur. Kanska at fingið Tottenham og José Mourinho á Tórsvøll, sigur Hannes Agnarsson.
Eftir vikuskiftið fæst at vita, hvørji mótstøðuliðini vera hjá KÍ og B36, og føroysku feløgini skulu í eldin aftur 17. september.
