29. juni í 2022 hevði Skála vitjan av AB í bestu deildini. Ta ferðina vann Skála 5-0. Tað var fyrsti og einasti sigur hjá Skála í bestu deildini í 2022, og tað endaði við, at Skála flutti niður í næstbestu deildina.
Í fjør gekk tað sum eftir ánni hjá Skála og Paula Poulsen, sum var venjari. Lagið var gott, tá ið Skála í heyst flutti upp, og tá ljóðaði, at nú fóru skálamenn at fyrireika seg at spæla í bestu deildini. Málið var at varðveita plássið í fremstu røð.
Í kvøld hevur Skála verið í fyrstu royndini eftir uppflytingina. Talan var um grannauppgerð. EB/Streymur var gestur undir Mýruhjalla, og tað gekk væl hjá Skála, sum vann 3-0.
Ein av fáu nýggju spælarunum á Skála er Ragnar Skála, sum higartil hevur verið miðvallari í barndómsfelagnum AB. Í kvøld var dysturin bara gott og væl tveir minuttir saman, tá ið Ragnar Skála legði Skála á odda. Hetta var sambært faroesoccer 58. landskappingardysturin hjá Ragnari Skála í bestu deildini, og í kvøld skoraði hann fyri fjórðu ferð í bestu deildini.
Hini bæði málini hjá Skála skoraði Jan Ingason Hansen. Sentrali miðvallarin hevur seinnu árini verið nógv skaðadarvaður. Í kvøld sá hann út til at vera væl upplagdur. Eitt stórt korter var farið, tá ið Jan økti um munin til 2-0, og so kendist mótbrekkan hjá EB/Streymi at vera øgiliga brøtt.
Miðvallarin Emil Weihe Joensen, sum í vikuni flutti úr B36 og til EB/Streym, hevði undan steðginum góðan møguleika at minka um munin, men hálvleiksstøðan var 2-0.
Tveir minuttir eftir steðgin sá EB/Streyma miðverjin Mikkjal Hellisá beinleiðis reytt kort, og so vóru tað 10 gestir ímóti 11 heimamonnum. Hjá EB/Streymi kom tað eyka illa við at missa miðverjan, tá ið hin fasti miðverjin Andras Ó. Olsen ikki var við, tí hann var leikbannaður.
Tá skifti EB/Streymur ein av nýggju monnunum á miðvøllinum, Suna Herman Petersen út við miðverjan Elias Isaksen.
Miðskeiðis í 2. hálvleiki var Jan Ingason Hansen aftur upp á spæl, tá ið hann staðfesti 3-0 heimasigurin.
Síðstu 20 minuttirnir vórðu eyðkendir av, at báðir partar skiftu nógvar spælarar út.
Hjá EB/Streymi verður aftur sunnudagin talan um lykladyst, tá ið B68 verður gestur við Margáir.
Skála verður leygardagin partur av grannauppgerð ímóti NSÍ á útivølli.
Skála – EB/Streymur 3-0 (2-0)
1-0: Ragnar Skála
2-0: Jan Ingason Hansen
3-0: Jan Ingason Hansen
Dómari: Rúni Olsen
Skála: Karstin Hansen – Bjarti Thorleifsson, Jákup Jakobsen, Kristian Martin Jacobsen, Djóni Petersen – Niclai Møller Dohn, Ragnar Skála – Marjus Nón, Jan Ingason Hansen, Teitur Poulsen – Carlos Ferreira
EB/Streymur: Jóannes Davidsen – Jens Erik Bruhn, Mikkjal Hellisá, Rógvi Egilstoft, Bergur Poulsen – Tóki H. Johannesen, Virgar Jónsson, Emil Weihe Joensen, Hans Pauli á Bø, Suni Herman Petersen – Filip Djordjevic
