Maðurin, ið millum annað var ákærdur fyri at hava sett eitt vakmyndatól upp í eini sólarmiðstøð í Havn, varð í Føroya rætt í dag dømdur seks mánaðir treytaða fongsulsrevsing.
Dómarin metti mannin vera sekan í øllum fýra ákærunum, tað vil siga, í at hava stolið atgongumerki til eitt dansistað í Havnini fyri nærum hálva millión, at hava sett upp vakmyndatól í eini roynd at filma nakin konufólk, at hava stolið ein harddisk til eina teldu, umframt at eiga stórar mongdir av dopingevnum.
Ákærin kravdi átta mánaðars fongsul og vísti á, at maðurin fyrr var dømdur fyri blygdanarskemd. Hon metti, at lógarbrotini vóru so grov, at dómurin ikki átti at vera treytaður, og víst hon millum annað á, at maðurin visti, at fólkini í sólmiðstøðini vóru nakin. Hon kundi tó góðtaka, um partar av dóminum vóru treytaðir.
Verjin meinti, at tað ikki var rætt, at døma mannin hægri enn tríggjar mánaðir treytaða fongsulsrevsing. Hann legði dent á, at maðurin hevði játtað seg sekan í fleiri av ákærunum, at hann ikki hevði sæð nakra av videoupptøkunum frá myndatólinum og at talan var um gamlar sakir, tað eru hálvttriðja ár síðani maðurin var handtikin.
Dómarin dømdi mannin seks mánaðar treytaða fongsulsrevsing við eini royndartíð í tvey ár og gav honum eina bót áljóðandi 2000 krónur. Harumframt varð hald lagt á øll dopingevnini og atgongumerkini, sum maðurin hevði heima hjá sær.
Dómarin sigur, at hann legði dent á, at sakin var gomul. Hetta var høvuðsorsøkin til, at dómurin gjørdist treytaður, allur sum hann var. Bótin skuldi eisini verið hægri, men var av somu orsøk lækkað samsvarandi ávísingum frá Hægsta rætti.
