Sjokuláta er ikki bara sjokuláta. Góð sjokuláta er sum gott vín ella kaffi. Hesar marglætisvørur skulu hjúklast um og røktast sum nýføðingar. Og vit skulu ikki ræðast at keypa dýraru sløgini, tí tað loysir seg sum oftast. Fyri góðskuna á sjokulátuni hevur slagið av kakabønu avgerandi týdning, eins og gróðrarlíkindin, handfaringin og viðgerðin í framleiðsluni.
Limirnir í danska felagnum fyri frelstar sjokulátuelskarar, »Chokoladekompagniet«, hittast á hvørjum ári til sjokulátufestival. Á festivalinum 2009 vórðu tríggir prísir handaðir, og limirnir fingu tvær spennandi sjokulátur at smakka: ein heitan munn og ein sjokulátumuss. Royn fantastisku uppskrifturnar heima og dvøl við gudunum eina løtu.
Gudadrykkur Azteka
1/2 litur av millummjólk
5 cm av kanelstong
2 heilir nelikar
2 cayennapipar ella ein hálv frísk chili
1/4 tsk. fræ av anis
1 dl kókandi vatn
40 g av góðari myrkari sjokulátu
2-3 spsk. av hunangi ella ráum rørsukri
Mjólkin verður sett útá. Morla kanelstongina varliga og rist hana turra saman við hinum kryddinum. Koyr kryddið í mjólkina og lat standa í 8-10 min. Kóka nakað av vatni í einari grýtu, har alt passar í. Hakka sjokulátuna og píska hana í kókandi vatnið til hon er upployst. Sløkk undir sjokulátuni. Smakka mjólkina til við kryddi. Tá hon er kókandi heit og passaliga kryddað, verður hon sílað varliga yvir sjokulátuna, meðan tú pískar. Smakka til við hunangi ella rørsukri. Píska til tað skúmar og borðreið í smáum gløsum.
