Svenska sjónvarpsstøðin SVT sigur, at teir fýra floksleiðararnir á svenska høgraveinginum ætla at halda tíðindafund í morgin klokkan 10 lokala tíð.
Har fara teir at leggja fram eina avtalu um stjórnargrundarlag fyri komandi fýra árini.
Klokkan 11 skal formaðurin í Moderaterna, Ulf kristersson, hitta sonevnda talmannin (tingformannin) fyri at geva honum boð um nýggja svenska stjórn.
Í gjár var freistin annars úti fyri at skipa nýggja stjórn. Tað eydnaðist tó Ulf Kristersson at fáa freistina longda til í morgin.
Sambært SVT eru ætlanir um eina atkvøðugreiðslu í Ríkisdegnum um nýggju stjórnina mánadagin. Verður meiriluti, kann stjórnin taka við í næstu viku.
Flokkarnir í semjuni eru Svøríkisdemokratarnir, Liberalarnir, Kristindemokratarnir og Moderatarnir. Teir hava samráðst seinastu dagarnar um avtaluna.
Val var í Svøríki 11. september, har teir fýra flokkarnir fingu meiriluta.
/ritzau/
