Farið verður nú undir ein granskingar- og vitanardepil á Kambsdali. Talan er um fyrra av tveimum byggistigum, ið snúgva seg um upphiting við varandi orkukeldum Fyrra stig er sólorkuskipan, ið verður knýtt at nýggja barnagarðinum á Kambsdali, meðan annað stig er framleiðsla av vetni við nýggjum ættarliði av vindmyllum. Tað skrivar heimasíðan hjá Fuglafjarðar kommunu.
Talan er um rættiliga víttfevnandi verkætlan, við luttøku av eitt nú Center for Arktisk Teknologi í Sisimiut, Pure Energy í Hetlandi, Náttúruvísindaligu deildin á Fróðskaparsetrinum og studentaskúlin á Kambsdali. Gjøgnum NORA-játtanina er verkætlanin eisini longu knýtt upp í millumtjóða granskingar- og menningarsamstarv.
Vilhjálmur Nielsen, verkætlnarleiðari, ið hevur verið við í fyrireikandi arbeiðinum, vísir á, at talan fer at verða um rættiliga áhugaverdan depil fyri føroyskar og útlendskar granskarar: - Talan verður um eina altjóða fyrimynd, ið fer at gera tað áhugavert hjá ferðafólki sum heild at koma higar.
Fuglafjarðar kommuna er millum teirra, ið fíggja verkætlanina. Hetta er m.a. gjørt við at velja sólorkuútbúnað til barnagarðin, ið er áhugaverd í vísundaligum høpi.
- Vit hava góðar royndir av alternativari orku; vit hava nýtt sólorkuskipan í Eldrasambýlinum Vesturstovu, og hon hevur riggað rættiliga væl. Tí ber til at siga, at valið av útbúnaði til barnagarðin á Kambsdali var náttúrligt, sigur borgarstjórin við heimasíðuna.
