Russland hevur í dag vunnið 1-0 á Finnlandi í øðrum umfari í bólkaspælinum. Einsamalla málið í dystinum skoraði Aleksey Miranchuk í yvirtíðini í fyrra hálvleiki.
Finnland, sum púra óvæntað vann á Danmark í fyrsta umfarinum, kundi við einum stigi í dag næstan tryggja sær víðari luttøku. Finnland fekk eisini eitt gott mál longu aftaná fýra minuttir, men stútarin hjá Joel Pohjanpalo bleiv kolldømdur fyri rangstøðu.
Í hinum endanum mátti russiski Mario Fernandes berast av vøllinum, eftir samanstoyt. Hann hevur fingið rímiliga álvarsligan skaða í ryggin, boðar russiska Fótbóltssambandið frá. Beint fyri hálvleik var aftur dramatikkur, tá tveir mans rendu saman. Russarin endaði á stongini og eftirfylgjandi sendi hann fótin – av óvart – í andlitið á spælaranum hjá Finnlandi.
Avgerandi løtan kom í yvirtíðini í fyrra hálvleiki, tá Aleksey Miranchuk heldur ótarnaður slapp at senda bóltin upp í handara málhorn. Hann stóð nakað í høgru inni í brotsteiginum, og kundi nakað ópressaður senda bóltin við sínum vinstra beini upp í handara málhorn.
Við sigrinum er Russland við í dystinum, um at koma víðari úr bólkaspælinum, meðan Finnland nú gjarna skal hava stig móti Belgia í seinasta dystinum í bólkaspælinum. Í morgin spæla Danmark og Belgia.
Bólkur B:
Finnland – Russland 0-1 (0-1)
0-1 Aleksey Miranchuk, 45+2
Støðan:
1. Belgia 3
2. Russland 3
3. Finnland 3
4. Danmark 0
