Omanfyri finst fyrrverandi fíggjarmálaráðharrin Karsten Hansen at núverandi samgongu fyri ikki at siga greitt, hvørjar avleiðingarnar eru av lønarvøkstrinum á almenna arbeiðsmarknaðinum. Karsten Hansen vil vera við, at stórar eykajáttanir eru eitt krav, um samgongan skal megna at fíggja lønarhækkingarnar á 4,5% til starvsfólk á almenna arbeiðsmarknaðinum, og harvið verður talan um eitt enn størri hall á ársins fíggjarlóg.
Íløgur hildnar aftur
Núverandi fíggarmálaráðharrin úr Sambandsflokkinum, Bárður Nielsen, sigur, at Karsten Hansen hevur sæð burtur frá teimum sparingum, sum longu nú eru settar í verk, og sum skulu útvega pening til fullu lønarkompensatiónina.
- Vit arbeiða í løtuni undir eini bráðfeingisfíggjarlóg, og tískil mugu vit gjalda fulla lønarkompensatión, men vit vinna hesar útreiðslur aftur við sparingum á íløguøkinum, sigur fíggjarmálaráðharrin. Bárður Nielsen vísir á, at fleiri av teimum tiltøkum, peningur er játtaður til, verða av núverandi samgongu hildin aftur, og í hesum liggja sparingarnar.
- Nógv nýtt virksemi skuldi verið byrjað, sum vit hava valt at steðga, og við hesum spara vit í upphæddum, sum viga upp ímóti lønarvøkstrinum, sigur Bárður Nielsen.
Spurdur, á hvørjum ítøkiligum økjum nýggjar verkætlanir eru steðgaðar, er aftursvari frá fíggjarmálaráðharranum, at sparingar í íløgum eru gjørdar á øllum økjum, har bundnir sáttmálar ikki áseta játtanir við lóg.
- Sostatt vinna vit pening við at strika nakrar av teimum játtanum, sum nú eru samtyktar undir verandi bráðfeingisfíggjarlóg, og hesar sparingar fíggja fullu lønarkompensatiónina á 4,5% á almenna arbeiðsmarknaðinum, vit í løtuni gjalda, sigur Bárður Nielsen úr Fíggjarmálaráðnum.
