Kappríðingin byrjar leygardagin klokkan15. Kappast verður í ikki minni enn fimm ymiskum greinum: Trav, skei, tvíspor ung, tvíspor 2. flokkur og tvíspor 1. flokkur. Allir vinnarnir fáa steyp til ognar, sum Poul Hansen Heilsøla, hevur latið.
Aftaná várkappríðingina í Vágum verður ymisk undirhald. Kapping verður fyri old boys. Luttakarnir skulu vera fyltir 35 ár og skulu ikki kappast í aðrari kapping í tvíspor. Eisini fara limir í Vága Ríðingarfelag at royna seg í togtogan ímóti ríðigestum av oynni. Hetta var eisini roynt í fjør, og tá vóru Vágamenn við yvirlutan.
Stórt bál
Kl. 17 verður ponyríðing og mattombola. Sum nakað heilt nýtt verður eisini tann vælumtókti klatriveggurin hjá jamboree-skótunum við. Her er møguleiki hjá gomlum og ungum bjargarfólki at royna síni roysni.
Um kvøldið fer Ungdómsorkestrið í Vágum at spæla, og tað verður eisini barnadiskotek.
Kl. 21.30 verður tað stóra bálið tendrað, og kl. 22 verður felagssangur, og Ólavur Hátún, fyrrverandi musikkskúlastjóri fer at flyta fram røðu.
Tiltakið hjá Vága Ríðingarfelag endar við dansi, har Twilight fer at spæla.
