Grønlendski landsstýrisformaðurin, Kim Kielsen, stuðlar framvegis landsstýrismanni sínum, Vittus Qujaukitsoq, eftir at hesin hevur funnist hvassaliga at donsku handfaringini av málum, ið viðvíkja Grønlandi.
Vittus Qujaukitsoq, sum er landsstýrismaður í uttanríkismálum, hótti herfyri í samrøðu við Politiken millum annað við, at Grønland fór at melda seg út úr ríkisfelagsskapinum, men hetta fær nú ongar avleiðingar fyri hann ella landsstýrissess hansara.
Á tíðindafundi í gjár staðfesti Kim Kielsen, at hann skilti væl, at Qujaukitsoq hevði kent seg ørkymlaðan av samstarvinum við Grønland, tí tað ikki heldur í longdini, tá upplýsingar úr Danmark enda í miðlunum, áðrenn grønlendsku myndugleikarnir hava sæð tær.
Tí helt landsstýrisformaðurin eisini, at samskifti millum Grønland og Danmark má verða betri, enn tað er, og Kim Kielsen skal í januar á fund við danska forsætisráðharran, Lars Løkke Rasmussen, har hann fer at taka hetta málið upp.
Eisini uttanríkis- og trygdarpolitiska nevndin hjá grønlendska landstinginum hevur tikið tað til eftirtektar, sum Vittus Qujaukitsoq sjálvur hevur sagt eftirfylgjandi, at hann í blaðsamrøðuni við Politiken er misskiltur.
