Fyrrapartin kom avloysaraskipið hjá Smyrli, Prince, á Tvøroyri.
Prince skal avloysa, tá Smyril fer í dokk. Prince byrjar í sigling leygardagin.
Færri túrar verða, nú Prince, sum er størri enn Smyril, fer at sigla millum Havnina og Suðuroynna. Ferðaætlanin hjá Prince sæst á ssl.fo.
Ferðaætlanin er løgd við støðið í avtalum við reiðarí og manning, um at halda altjóða sáttmálar fyri manningar við handilsskipum, og er nakað øðrvísi enn tann sum Smyril hevur havt, skrivar Strandferðslan á síni heimasíðu.
Tað eru færri túrar um vikuna, umframt at Prince liggur hvørja nátt á Tvøroyri. Eisini eru tíðarbilini millum túrarnar eitt vet longri í miðal, enn vanligt, hetta verður gjørt millum annað tí at Prince er eitt væl størri skip enn Smyril, og kann hava tørv á meiri tíð til at koma til og frá bryggju.
Ætlandi verður ferðaætlanin eftirmett eina viku eftir at skipið er farið í sigling soleiðis at tillagingar kunnu gerast um neyðugt, skrivar Strandferðslan á ssl.fo.
##med2##
##med3##
##med4##
##med5##
