Umboð fyri allar flokkar verða við til valdyst í Føroyahúsinum í Keypmannahavn í kvøld.
Til løgtingsvalið 1. september hava 670 føroyingar uttanlands valrætt. Stórur partur av teimum eru lesandi í Danmark. Í ár hava 245 fleiri verljarar uttanlands skrásett seg, og tí ræður um hjá flokkunum at reka veljarar í rætt uttanlands eisini.
Tað verður gjørt í kvøld, tá valfundur verður í Føroyahúsinum í Keypmannahavn.
Tað er MFS, sum skipar fyri politiskum pallborðsfundinum í Føroyahúsinum í Keypmannahavn. Umboð fyri allar politisku flokkarnar fara at siga frá sínum sjónarmiðum og at kjakast um útbúgvingar-, heilsu- og sosialpolitikk umframt haldføri hjá føroyska búskapinum.
Umboðini vera:
Hanus Samró, Fólkaflokkurin
Kristina Háfoss, Tjóðveldi
Mai Laksáfoss Simonsen, Sambandsflokkurin
Helena Dam á Neystabø, Javnaðarflokkurin
Ruth Vang, Framsókn
Rúna Sivertsen, Nýtt Sjálvstýri
Vilhelm Hendrik í Skálanum, Miðflokkurin
– Sum vant verður høvi hjá øllum at seta spurningar til politisku flokkarnar. Tað fer eisini at bera til at greiða atkvøðu á staðnum, um ein hevur samleikaprógv við, siga fyrireikararnir.
Skráin fyri kvøldið verður:
19.00 – Dyrnar verða latnar upp
20.00 – Tiltakið byrjar og MFS bjóðar vælkomin
20.50 – Útbúgvingarpolitikkur og heilsupolitikkur
Lítil steðgur
21.10 – Sosialpolitikkur og haldføri hjá føroyska búskapinum.
Pallborðsfundurin endar áleið kl. 22.00, og øll eru hjartaliga vælkomin, siga fyrireikararnir.
