Um tú selur partabrøv við vinningi, skal inntøkan setast á sjálvuppgávuna.
Antin við vilja ella av ósketni vóru tað fleiri fólk, sum ikki góvu upp vinningin, og tá ið Taks í 2007 fór undir eitt serligt átak fyri at kanna, um rætt var uppgivið, kom Taks fram á umleið 600 fólk, sum ikki høvdu uppgivið vinningin av partabrøvum. Tey høvdu harvið brotið lógina um kapitalvinning.
Hesi fólk fingu at hoyra frá Taks, sum ikki bara kravdi tey at gjalda skattin men eisini gav teimum eitt sektaruppskot.
- Tey flestu góðtóku sektarupppskotið men nøkur vildu ikki gjalda, og tey málini hava vit latið politinum, sigur Eyðun Mørkøre, stjóri á Taks.
Umleið 20 mál av hesum slagnum eru latin politinum, sum nú fer at eftirkanna málini og sektaruppskotini.
Sektaruppskotini eru ymisk til støddar, og okkurt er nakrar hundrað túsund krónur.
