Sambært Fiskamarknaði Føroya eru í dag fimm partrolarapør til fiskiskap í løtuni. Hinir allir partrolararnir liggja við bryggju, nú veðrið er so vánaligt, men teir fara útaftur, tá veðrið batnar.
- Fiskiskapurin eftir upsa er vánaligur, men partrolarapørini fáa eisini nakað av toski og longu, verður lagt aftrat. Sum skilst, hevur lítil og eingin upsafiskiskapur verið í bestu tíðini í vár.
Í dag eru eisini tveir djúpvatnstrolarar til fiskiskap. Annar ger yvirlitstrolingar á Føroyabanka og hin fiskar stinglaks. Hinir djúpvatnstrolararnir liggja við bryggju, men fara útaftur, tá veðrið batnar.
Nú veðurlíkindini eru so vánalig, er eingin av teimum smáu trolbátunum til fiskiskap. Allir liggja við bryggju.
At enda vita tey á Fiskamarknaði Føroya at siga í dag, at eitt garnaskip fiskar svartkalva, og eitt fiskar havtasku. Bæði skipini koma at landa í næstu viku, og fiskiskapurin er brúkiligur.
