23 menn, sum arbeiddu fyri kanadiska oljufelagið Talisman Energy Inc. í einum fjarskotnum frumskógarøki í kolombiska landspartinum Vichada, eru burturfluttir. Guvernørurin á staðnum sigur, at tað vóru limir í vinstrasinnaðu uppreistrarrørsluni Farc, sum burturfluttu menninar.
-Uppreistrarmenninir lupu á leguna og noyddu teir 23 menninar við sær út í frumskógin, sigur guvernørurin við kolombiska útvarpið.
Ein talsmaður fyri kanadiska oljufelagið vildi ikki gera viðmerkingar til tíðindini.
AP-tíðindastovan skrivar, at burturflytingar eru ikki so vanligar í Kolombia longur, men at av og á verða fólk, sum arbeiða í fjarskotnum støðum fyri oljufeløg og námsfeløg, burturflutt.
