Nógvar spennandi uppgávur bíða Óla Mittún.
2. til 12. august skal hann saman við liðfeløgunum á U19-landsliðnum royna at vinna Føroyum eina góða endastøðu í U19 HM-endaspælinum í Kroatia.
Í heyst skal hann saman við liðfeløgunum í Sävehof royna seg í seks bólkadystum í EHF European League.
Sävehof, ið er styrkismett sum nummar trý í bólkinum er komið í bólk saman við BM Cuenca úr Spania og Gorenje Velenje úr Slovenia. Fjórða liðið í bólkinum verður antin Aguas Santas úr Portugal ella Pfadi Winterthur úr Sveis.
Hákun West av Teigum og liðfelagarnir í Füchse Berlin skulu eisini royna seg í bólkaspælinum í EHF European League í heyst.
Füchse Berlin, ið er styrkismett ovast er komið í bólk saman við Dinamo Bukarest úr Rumenia, Chambery Savoie úr Fraklandi og RK Izvidac úr Bosnia og Hersogovina.
32 lið í átta bólkum fara at kappast í EHF European League. Tvey tey ovastu liðini úr hvørjum bólki fara at kappast í áttandapartsfinalunum.
