Bara at senda neyðhjálp til Cambodia og at stuðla onkrum skúla í Liberia, gevur ikki formanninum tað rásarúmið, sum krevst. Tí vóru hyggjuráðini, at Anfinn Kallsberg legði frá sær, og at Jørgen tekur yvir sum skuggafíggjarmálaráðharri í fíggjarnevndini og har fær framt fólkaflokspolitikk í verki, sum hann ikki fær í Uttanríkisráðnum.
Um vikuskiftið síðsta royndi Javnaðarflokkurin at skapa yvirskiftir við at latast sum um, at flokkurin lat seg freista av tilboð frá Tjóðveldinum um, at Eyðgunn Samuelsen skuldi gerast forkvinna í fíggjarnvendini – afturfyri, og sum takk fyri seinast.
Í hesi vikuni eru tað teir smáu, sum royna at seta yvirskriftir. Miðflokkurin og Sjálvstýrisflokkurin vilja ikki vera við til at gera liðugt arbeiðið í Stjórnarskipanarnevndini. Sjálvstýri fer at skriva sítt egna álit, tí hitt førir ikki til nakað, meðan Miðflokkurin heldur Hans Paula Strøm vera so ringan sambandsmann – og so fær flokkurin heldur
ikki tað ófødda barnið við í stjórnarskipanararbeiðið.
Tríggir sjálvstøðugir tingmenn, ein úr andstøðuni, ein úr andstøðuni í samgonguni og ein úr samgonguni – hava lagt uppskot fram á ting um at skerja tingmannatalið úr 33 niður í 25. Júst hví 25 er tað magiska talið, hava teir onga góða grundgeving fyri, uttan hana, at »tað verður bíligari at reka samfelagið«, og at tað fer at smitta av gjøgnum alla skipanina.
Jú, mangt skal man hoyra. Men skal tað vera 25, hví so ikki 22, ella 18 ella 15? Jú færri jú bíligari, ikki so?
Hetta má vera politiska skipanin í einum nøtuhylki: Sjónleikur og glantrileikur, sjálvdráttur og sundurlyndi. Hetta bendir á, at politikarar heldur vilja gera okkurt annað. Onkur vil látast sum um og vinna øðrum neisur, fleiri vilja fyri alt í verðini seta síni egnu fingramerki, meðan onkur kanska heldur vil halda seg til valdið.
Onkur fjáltur tykist vera á tingfólki, sum hava so stóran tørv á at markera seg – um enn við rættiliga líkagyldugum málum. Og tað hendir, meðan stórmál liggja fyri framman – stórmál, sum skulu reformera – eitt nú fiskivinnan, kommunurnar og skúlaskipanin – fyri ikki at gloyma fíggjarkarmin fyri komandi árið.
Eyðsæð er, at valið nærkast.
